Wie heiß et doch: Kölle, do bes e Jeföhl!
Ävver et schönste Jeföhl es: ich ben en Ühl!
Dann häs do em Levve quasi alles errich
un dinge Zostand es däm Elysium jlich,
oder, wie ich einst befand:
mer es em vierte Aggregatzostand:
mer es weder flüssig, noch fess oder e Jas.
Mer es irjendjet zwesche Calvados un Faß.
Vür aach Johr sin mer jejange dä Schrett
un Jutta un ich, mer bereuen et nit.
Un eines woodt uns domols als klor
dat mer janz bovven op der Leider anjekummen wor.
En ener Jesellschaff, die su vill zo beede hät:
die J'UHUs, die UHUs un – e Schnäuzerballett.
Schnäuzer
Stets nöchtern, sittsam un adrett:
die Zier der Jesellschaff: et Schnäuzerballett.
Frede Poosche, einer noh'm andere
süht mer en Kölle die Bühne erop wandere.
Jott sei Dank nit puddelrühs
wöödten jo die Fraulück beklopp
un mer hätt donoh schreckliche Belder em Koppsondern
met Frack, Hötche un Paraplü,
wießer Botz un rude Socke
su dat nit nor die Wiever frohlocke.
Ston op der Bühn die staatsen Bauern,
höört mer et em Saal erschauern
un die Spannung es am knistern,
he un do höört mer et flüstern:
ach wie schön wör diese Fete,
wann se bloß nit danze dähte.
Doch vürren steiht wie eine Fee
met Körbchengröße 80 E
immer öndtlich en Fatzung
uns staats Marie, die Trumm vun der Strung
un deiht dä Offezeer beloore,
dä ärme Kääl es zo bedoore,
pack in tireck dann an der Hüfte
un dä Jung fleech durch die Lüfte.
Doch jitz, leeven Stefan, mer mööch tireck kriesche,
höörst do op als Tanzmarieche
un mänch einer frög sich: woröm, wat es loss?
Do worst doch unser aller Aujetruß!
Häst do zo vill vum Dösje versenk
oder hät et dir dä BH jesprenk?
Hät dä David nit öndtlich pareert
oder worst do ungen eröm nit öndtlich raseert?
An den Beinen!
Oder wor et noh sibbe Johr Tort
endlich ens jenoch met däm Leistungssport?
Hauptsaach do blievs bei däm Schmölzje un woodts ald ernannt
zom däm neue Marieche ehr Adjudant.
Un die es, wie soll ich et sage, maneerlich pussierlich:
dä Kjell, 2,04, anmutig und zierlich.
För et Publikum weed dat en Freud.
Nor, leeven David, do deihs mer jitz ald leid!
Nit nor Lückcher op zwei Beine
dun em Rampeleech erscheine,
enä do jitt et och e Dier
un dat hät der nömlich derer vier
un es aller Ihre wääd.
Ehr wesst, wat kütt, et es dat Päd.
Su ene Danz kann nor jelinge,
deiht dat Päd vun vürren un hinge
jod avjestemmp höösch voltejeere,
vun Kopp bes Stätz sich arrangeere.
un dat mäht et met Akie.
Wat en Choreogaphie!
O'm räächte Plaatz hät et si' Hätz
un üvver der Fott ne staatse Stätz.
Wichtig bei däm janze Spill:
dä Wohlklang zwesche Liev un Siel.
Su muss dä Schnäuzer stetig müffele,
domet et mangs weed dozo süffele
un hält somet die Kunst en Ihre.
Haupsaach: bloß nit dehydreere.
Wat immer jod wor för die Stroß
es ene jode Calvados.
E Dösche em Barrrique jereift
hält däm Boor nit nor dä Schnäuzer steift,
enä, och die allerschönsten Künste
reifen in der Äpfel Dünste.
Wesst ehr, wo ich hät drop Loß:
eimol met üch zosamme em Bus.
Natürlich alles op ühr Koste,
oder dä Fahrer zallt, dä Thorsten.
Dä woodt jo vun üch, et es allerhand,
zom hässlichste Schnäuzer 2025 ernannt?!
Leeven Thorsten, jläuv denne nie,
dann wä solche Fründe hät, bruch kein Feinde mih.
Doför word ehr jo all en der Nederlande
do weed Kölsch besser als em Jözenich verstande.
Am eeschte Oktober, was läge dort ferner,
jeiht et loss för die Schnäuzer beim Knippschilds Werner,
weil nächs Johr weeden se 50 Johr!
Strammer Buch un volles Hoor,
wieße Zäng un die Äujelcher luus
dat mäht ene staatse Schnäuzer us!
J'UHUs
Wat öndtliche Nohwuchsarbeid bedügg
zeige die J'UHUs, an die 150 Lück,
die dun nit nor op Parties rocke,
sondern sorje doför, dat dä Nohschub nit deiht stocke,
jetreu däm Motto „Wat Ahle künne, dun Junge liere
vun Hätze Fastelovend fiere“
wie wichtig es et, dat et üch jitt,
dann irjendwann sidd ehr uns Ahle ens quitt,
dann möht ehr sorge, dat dä Lade deiht brumme
un uns o'm Freedhoff jeeße kumme.
RoMo Zug
Wat för Ricarda Lang es singe Buch,
dat es för uns Kölsche dä Rusemondagszog.
Un besonders op der UHU Tribüne
herrsche Zoständ ohne Schold un Sühne,
die wie jeds Johr am Appellhoffplaatz stund
un op der et Laster un die Trunksucht wonnt
janz ejal, wat et och koss
2500 Liter Kölsch jinge durch de Stroß.
Dat wor ens widder UHU pur:
alles Doctores en Hektoliteratur.
Orden
Wann mer uns dä Orden esu besinn
mösse mer sage: dat Ding es schön.
Nor wat stellt dat Dinge en der Medden da?
Ene Kalbshirnpudding, dä nit janz jar?
Oder es dä amorphe Klumpen
dat geistige Zentrum vun Donald Trumpen
oder handelt et sich bei däm verdrüschte Semmel
öm dat Jeheenz vun däm Pimock us däm Kreml?
Oder einfach nor en Frikadell, öndtlich zerkaut
un donoh met vill Calvados oral verdaut?
Kumme mer zor Dubbelspetz
Jestandene Kääls, bestemmp kein Primaner
uns're zwei Oberindianer.
Oh Jott, jitz krijje ich die rude Kell:
dat wor Aneignung un zwar kulturell.
Dat Schönste zwesche Eifel un Kohlenpott
es ohne Frog dat Du Blum un Ott.
Die zwei ston jitz och em Guiness Boch:
weltweit längster Vürstand. Dodrop dreimol hoch!
Ehr Häupter stets en voller Glänze
weit jenseits noch der Schneefallgrenze.
Jeistreich beids em Jeckespill,
schwaade dun se kaum zo vill.
Nor et Nüdigste. Un dat met Mühen.
Jeder weiß: et kann sich ziehen.
Tipp för dä leeve Norbert Lenze
moss do irjendwann die Gage bejrenze,
weil nit jenoch en der Büggel kütt:
Scheck die zwei doch en die Bütt,
die maache doch dat janze Jedöns
för ehre Verein för ömesöns,
dann es et em Büggel nit mih klamm
un do häs mindestens fünef Stunde Gratis-Projramm.
Á pro-pos: deiht mer sich kölsche Setzunge beloore,
muss mer sage: die schönste maache die Boore.
Op der Bühn, wat selden et noch jitt,
steiht tatsächlich en richtije Bütt!
En der durft ich halden mingen Explezeer
et Publikum un ich mer hatte Plaisir,
ach wor dat schön un endete jäh,
weil drusse stund et Fesskumitee.
Alles andere weed tireck klein un nichtig,
weil et Fesskumitee es nu mal wichtig!
Bezöglich Damesetzung mööch ich berichte:
ab September es Henriette Jeschichte
Hoffentlich finge mer ne adäquate Ersatz
för dä nobelpriesträchtige Rekersche Satz:
dat em Rechtsrheinische Frau un Mann
och jod Fastelovend fiere kann.
Doför hatt it jesorch, do bes do platt,
dat die Uhus ston zick letz Johr em joldene Blatt...Boch
Un öm dä Ruhm noch zo verbrigge
av nächs Johr en dä jähle Sigge.
Em Tingsdagszog erfüllte mer die Quote (Vorsicht: Sprachwetz!)
musikalisch met Markus, der wandelden Note.
Als Saalkappelle treu immer bei uns.
Et Blose es jo en spezielle Kuns.
Un mäht zodäm doch och vill mih Spass
als Pille verkloppe hinger der Apothekekass.
Ich mööch sage, wat ald immer wahr war:
die beste Kapell nördlich der Sahara.
Wat roht ene Stolz deef en mer drin,
wat ben ich jlöcklich Deil vun üch zo sin
et kann doch janix Schöneres jevve,
als Naaksvujjel op der Schäl Sick zo levve!
Nä, et liet doch keinen kühl:
die Genesis vum Minsch zor Ühl.
So sin mir wie die Ühle schüchtern, leise,
fern der Laster, schön und weise.
Op Iwigkeit der Schäl Sick Zier
Ühl zo sin, dat es en Ihr.
Op uns Ühle, op et Levve,
mag et uns en 100 Johr noch jevve!
Alaaf! |
